2
October
Monday
01:00 AM

13o

LIGHT RAIN
TECHNOLOGY

ജിയോ ഫോണ്‍ ഉപയോഗം : കൂടുതല്‍ മാനദണ്ഡങ്ങള്‍ പുറത്ത്

30-09-2017

വിപണിയിലെത്താനിരിക്കുന്ന ജിയോഫോണ്‍ ഉപയോഗിക്കുന്നതിനുള്ള കൂടുതല്‍ മാനദണ്ഡങ്ങള്‍ പുറത്തുവരുന്നു. 1,500 രൂപ സെക്യൂരിറ്റി ഡെപ്പോസിറ്റ് വാങ്ങി ഉപഭോക്താക്കള്‍ക്ക് ചെലവുകളില്ലാതെയാണ് ഫോണ്‍ നല്‍കുന്നത് എന്നായിരുന്നു നേരത്തെ പറഞ്ഞിരുന്നത്. എന്നാല്‍ മൂന്ന് വര്‍ഷം നിര്‍ബന്ധമായും ജിയോഫോണ്‍ ഉപയോഗിച്ച് തിരിച്ചുനല്‍കിയാല്‍ മാത്രമേ പണവും നല്‍കുകയുള്ളൂ.മൂന്ന് വര്‍ഷവും 1,500 രൂപ സെക്യൂരിറ്റി ഡെപ്പോസിറ്റ് നല്‍കി വാങ്ങുന്ന ജിയോഫോണിന് വര്‍ഷം 1,500 രൂപയ്‌ക്കെങ്കിലും റീച്ചാര്‍ജ് ചെയ്തിരിക്കണമെന്നത് നിര്‍ബന്ധമാണ്. അങ്ങനെ വരുമ്പോള്‍ 4ജി ഫോണിന് വേണ്ടി മൂന്ന് വര്‍ഷംകൊണ്ട് 4500 രൂപ ചെലവാക്കേണ്ടിവരും. ഇത് പൂര്‍ത്തിയായാല്‍ മാത്രമേ ആ ഫോണ്‍ തിരികെ നല്‍കുമ്പോള്‍ സെക്യൂരിറ്റി ഡെപ്പോസിറ്റ് ആയി നല്‍കിയ 1,500 രൂപ തിരിച്ച് കിട്ടുകയുള്ളൂ. അത് മാത്രമല്ല, വര്‍ഷം 1500 രൂപയ്ക്ക് റീച്ചാര്‍ജ് ചെയ്യാന്‍ കഴിഞ്ഞില്ലെങ്കില്‍ കമ്പനി നിങ്ങളുടെ ഫോണ്‍ തിരികെ ചോദിക്കും. അങ്ങനെ വന്നാല്‍ നിങ്ങള്‍ അധിക തുകയും നല്‍കേണ്ടിവരും. ഫോണുകള്‍ ഉപയോഗിക്കാതിരിക്കുന്നതും ദുരുപയോഗം ചെയ്യപ്പെടുന്നതും തടയുന്നതിനാണ് ഈ നിബന്ധന.ഫോണ്‍ തിരികെ നല്‍കുന്നതിലുമുണ്ട് നിബന്ധനകള്‍. ഫോണ്‍ വാങ്ങി 12 മാസത്തിനുള്ളില്‍ തിരികെ നല്‍കിയാല്‍ നിങ്ങള്‍ക്ക് സെക്യൂരിറ്റി ഡെപ്പോസിറ്റ് തിരികെ ലഭിക്കില്ല. മാത്രവുമല്ല ഇതിന്റെ ജിഎസ്ടി അധികം നല്‍കേണ്ടിയും വരും. 12 മാസത്തിനും 24 മാസത്തിനും ഇടയിലാണ് തിരികെ നല്‍കുന്നതെങ്കില്‍ 500 രൂപ മാത്രമേ തിരികെ ലഭിക്കൂ. 24 മാസത്തിനും 36 മാസത്തിനും ഇടയിലാണ് ഫോണ്‍ നല്‍കുന്നതെങ്കില്‍ 1000 രൂപയും തിരികെ കിട്ടും.മൂന്ന് വര്‍ഷം പൂര്‍ത്തിയായാല്‍ മാത്രമേ 1500 രൂപ തിരികെ ലഭിക്കാനുള്ള അവസരമുണ്ടാകുകയുള്ളൂ. അതും മൂന്ന് വര്‍ഷം കൊണ്ട് 4500 രൂപ റീചാര്‍ജ് ചെയ്‌തെങ്കില്‍ മാത്രം. സാധാരണ ഫീച്ചര്‍ ഫോണുകളേക്കാള്‍ മികച്ച സൗകര്യങ്ങളും ആനുകൂല്യങ്ങളുമാണ് ജിയോഫോണ്‍ നല്‍കുന്നത്.  എന്നാല്‍ ജിയോഫോണ്‍ ഉപയോഗിക്കുന്നവര്‍ നിര്‍ബന്ധമായും നിയമങ്ങള്‍ പാലിച്ചിരിക്കണം. മനസ്സ് മീഡിയ