19
April
Friday
02:31 PM

13o

LIGHT RAIN
GULF

മസ്‌കറ്റില്‍ വാഹനാപകടത്തില്‍ എട്ടു മരണം

19-08-2017

മസക്കറ്റ് : ഹൈമയില്‍ വെള്ളിയാഴ്ച ഉച്ചക്ക് ശേഷം കാറുകള്‍ കൂട്ടിയിടിച്ചുണ്ടായ അപകടത്തില്‍ എട്ടു പേര്‍ മരിച്ചു. ആറു സ്വദേശികളും രണ്ടു യമനികളുമാണ് മരിച്ചത്. ഏഴുപേര്‍ക്ക് പരിക്കുണ്ട്. ഹൈമക്ക് 30 കിലോമീറ്റര്‍ തെക്കുമാറിയാണ് അപകടം നടന്നത്. അഞ്ചു പേര്‍ സംഭവ സ്ഥലത്ത് വെച്ചു തന്നെ മരിച്ചു. ഗുരുതര പരിക്കേറ്റ മൂന്നു പേര്‍ ആശുപത്രിയില്‍ എത്തിയ ശേഷമാണ് മരിച്ചത്. ടയര്‍ പൊട്ടിയതാണ് അപകടത്തിനു കാരണമായതെന്നാണ് റോയല്‍ ഓമാന്‍ പോലീസിന്റെ പ്രാഥമിക നിഗമനം. ടയര്‍ പൊട്ടി നിയന്ത്രണം വിട്ട വാഹനങ്ങളില്‍ ഒന്ന് എതിര്‍വശത്തുനിന്ന് വരുകയായിരുന്ന വാഹനത്തില്‍ ഇടിച്ചു കയറുകയായിരുന്നെന്നാണ് കരുതുന്നത്. ഇരു വാഹനങ്ങളും നിശ്ശേഷം തകര്‍ന്നു. ടയര്‍ പൊട്ടിയുള്ള അപകടങ്ങള്‍ ഒഴിവാക്കാന്‍ കൃത്യമായ അളവിലുള്ള യഥാര്‍ഥ ടയറുകള്‍ മാത്രമേ ഉപയോഗിക്കാന്‍ പാടുള്ളൂവെന്ന് പോലീസ് വാഹന ഉടമകളോട് അഭ്യര്‍ഥിച്ചു. വേനല്‍കാലത്ത് യാത്ര പുറപ്പെടും മുമ്പ് ടയറുകളുടെ അവസ്ഥ പരിശോധിക്കുകയും വേണം. അമിതവേഗം ഒഴിവാക്കണമെന്നും ആര്‍.ഒ.പി അഭ്യര്‍ഥിച്ചു. ഒരാഴ്ചക്കിടെ ഹൈമയിലുണ്ടായിരുന്ന രണ്ടാമത്തെ ദാരുണമായ അപകടമാണിത്. കഴിഞ്ഞ വെള്ളിയാഴ്ച രണ്ട് അപകടങ്ങളാണ് നടന്നത്. രാവിലെ നടന്ന അപകടത്തില്‍ ഷാര്‍ജയില്‍ നിന്ന് സലാലയിലേക്കു പോയ പാക്കിസ്ഥാനി കുടുംബത്തിലെ നാലംഗങ്ങളാണ് മരിച്ചത്. ഇവര്‍ സഞ്ചരിച്ച നാലുചക്ര വാഹനം സ്വദേശി വാഹനവുമായി കൂട്ടിയിടിക്കുകയായിരുന്നു. രണ്ട് ഒമാനികള്‍ക്ക് ഗുരുതര പരിക്കേല്‍ക്കുകയും ചെയ്തിരുന്നു. അന്നേ ദിവസം ഉച്ചയ്ക്കു ശേഷം ഹൈമയക്കടുത്ത് അല്‍ഗാഫ്ത്തീനും മഖ്ഷനുമിടയില്‍ ഒമാനി കുടുംബം സഞ്ചരിച്ച കാര്‍ നിയന്ത്രണം വിട്ട് മറിഞ്ഞ് ഒമ്പതു പേര്‍ക്ക് പരിക്കേറ്റിരുന്നു. മനസ്സ് മീഡിയ