തിരുവനന്തപുരം : സംരക്ഷിത വനമേഖലയ്ക്ക് ഒരു കിലോമീറ്റര്‍ ചുറ്റളവില്‍ ബഫര്‍സോണായി പ്രഖ്യാപിക്കണമെന്ന സുപ്രീം കോടതി വിധിക്കെതിരേ ആവശ്യമെങ്കില്‍ കേന്ദ്രസര്‍ക്കാര്‍ നിയമനിര്‍മാണം നടത്തണമെന്നാവശ്യപ്പെടുന്ന പ്രമേയം നിയമസഭ ഏകകണ്ഠമായി പാസാക്കി. പരിസ്ഥിതി ലോല പ്രദേശത്തിലെ ബഫര്‍സോണ്‍ വിഷയത്തില്‍ കേരളത്തിന് ഇളവുകള്‍ നല്‍കണമെന്നും ആവശ്യമെന്ന് കണ്ടാല്‍ ഉചിതമായ നിയമനടപടികളും നിയമനിര്‍മ്മാണ നടപടികളും സ്വീകരിക്കണമെന്നും മന്ത്രി എ.കെ. ശശീന്ദ്രന്‍ അവതരിപ്പിച്ച പ്രമേയത്തില്‍ ആവശ്യപ്പെട്ടു.

കേരളത്തിലെ പ്രത്യേക സാഹചര്യമനുസരിച്ച് സുപ്രീം കോടതി വിധി നടപ്പാക്കുന്നത് പൊതുതാല്‍പര്യത്തെ ബാധിക്കുന്നതും ജനജീവിതം ദുരിതത്തിലാക്കുന്നതുമാകും. ഇത് കേന്ദ്ര വിജ്ഞാപനം നടപ്പിലാക്കുന്നതിന് പോലും ബുദ്ധിമുട്ടുണ്ടാക്കും. വിസ്തൃതി കുറഞ്ഞ കേരളത്തിന്റെ 30%വും വനമാണ്. വനങ്ങളും കായലുകളും തടാകങ്ങളുമൊക്കെ ചേരുമ്പോള്‍ ഇത് 48%മാകും. ഇവിടെ ജനസാന്ദ്രത ചതുരശ്രമീറ്ററില്‍ 900ന് മുകളിലാണ്. അതുകൊണ്ടുതന്നെ ഈ ഉത്തരവുകള്‍ നടപ്പാക്കാന്‍ അനുയോജ്യമായ പ്രദേശങ്ങള്‍ കേരളത്തില്‍ കുറവാണ്. അതുകൊണ്ട് ജനവാസ കേന്ദ്രങ്ങളെ പൂര്‍ണമായുംഒഴിവാക്കികൊണ്ട് സംസ്ഥാനം സമര്‍പ്പിച്ച നിദേശത്തിന്റെ അടിസ്ഥാനത്തില്‍ തീരുമാനം എടുക്കണം.പ്രമേയത്തില്‍ പറയുന്നു.

എന്‍. ഷംസുദ്ദീന്‍ അവതരിപ്പിച്ച രണ്ടു ഭേദഗതികളോടെയാണ് പ്രമേയം പാസാക്കിയത്. എന്നാല്‍ പ്രമേയം അവതരിപ്പിക്കുന്ന സമയത്ത് പ്രതിപക്ഷവുമായി ആലോചിച്ചില്ലെന്ന പരാതി പ്രതിപക്ഷനേതാവ് വി.ഡി. സതീശന്‍ ഉന്നയിച്ചു. ഈ മാസം 12ന് സുപ്രീം കോടതി തുറക്കുമ്പോള്‍ അവിടെ നല്‍കുന്ന പരാതിക്കൊപ്പം നല്‍കേണ്ട അടിയന്തിരസാഹചര്യമുണ്ടായിരുന്നതുകൊണ്ടാണ് ഇത്തരമൊരു പ്രമേയം അനിവാര്യമായി വന്നതെന്ന് മന്ത്രി കെ. രാധാകൃഷ്ണന്‍ വിശദീകരിച്ചു. ഇത് മാനിച്ച് പ്രതിപക്ഷം സഹകരിച്ചു.

പരിസ്ഥിതി ലോല പ്രദേശവുമായി ബന്ധപ്പെട്ട കേരള സര്‍ക്കാര്‍ മുന്‍പ് നല്‍കിയ രേഖ കൂടി പരിഗണിച്ച് തീരുമാനം എടുക്കണമെന്ന പ്രമേയത്തിലെ വാചകം നീക്കം ചെയ്യണമെന്ന് പ്രതിപക്ഷനേതാവ് ആവശ്യപ്പെട്ടു. അത് 2019ലെ മന്ത്രിസഭാ തീരുമാനത്തിന് വീണ്ടും പ്രാമുഖ്യം നല്‍കുമെന്നും തിരിച്ചടിയാകുമെന്നും അദ്ദേഹം ചൂണ്ടിക്കാട്ടി. അത് അംഗീകരിക്കാന്‍ മന്ത്രി ശശീന്ദ്രന്‍ തയാറായില്ല.

നേരത്തെ ഇത്തരത്തിലുള്ള ഒരു അനൗദ്യോഗിക പ്രമേയം അവതരിപ്പിക്കാനായി മാത്യു കുഴല്‍നാടന്‍ നോട്ടീസ് നല്‍കിയിരുന്നതും അത് അംഗീകരിച്ച് സര്‍ക്കുലേറ്റ് ചെയ്തതായും പ്രതിപക്ഷ നേതാവ് ചൂണ്ടിക്കാട്ടി. ഇത് നടപടിക്രമങ്ങള്‍ക്ക് വിരുദ്ധമാമെന്നും അദ്ദേഹം പറഞ്ഞു. സാഹചര്യം അടിയന്തിരമായതുകൊണ്ടാണ് അത് മാറ്റി ഈ പ്രമേയം കൊണ്ടുവന്നതെന്ന് മന്ത്രി രാധാകൃഷ്ണന്‍ വ്യക്തമാക്കി. മാത്യു കുഴല്‍നാടനുമായി ഇക്കാര്യം സംസാരിച്ചിരുന്നുവെന്നും അദ്ദേഹം അറിയിച്ചു. പ്രമേയം സര്‍ക്കുലേറ്റ് ചെയ്ത സാഹചര്യത്തില്‍ ഔദ്യോഗികപ്രമേയം കൊണ്ടുവരുന്നത് അനുചിതമാണെന്ന് സ്പീക്കര്‍ വ്യക്തമാക്കി. എന്നാല്‍ അടിയന്തിരസാഹചര്യം മനസിലാക്കി അനുവദിക്കുന്നുവെന്നും അദ്ദേഹം പറഞ്ഞു.മനസ്സ് മീഡിയ.