തിരുവനന്തപുരം : എ.കെ.ജി. സെന്ററിലേക്കു സ്‌ഫോടകവസ്തു എറിഞ്ഞ സംഭവം നാലാം ദിവസത്തിലെത്തിയിട്ടും പോലീസ് ഇരുട്ടില്‍ത്തന്നെ. എ.കെ.ജി. സെന്ററിനു കല്ലെറിയുമെന്നു ഫെയ്‌സ്ബുക്കിലെഴുതിയ യുവാവിനെ പിടികൂടിയെങ്കിലും സ്‌റ്റേഷനില്‍നിന്നുതന്നെ ജാമ്യം നല്‍കി പോലീസ് തടിയൂരി.അതിനിടെ, ചിലരെ കേന്ദ്രീകരിച്ച് അന്വേഷണം നടത്താനുള്ള പ്രത്യേക സംഘത്തിന്റെ തീരുമാനത്തിനു മുന്നില്‍ 'ചുവപ്പുകൊടി' വീശിയതായി ആക്ഷേപമുണ്ട്.

ഇന്നു നിയമസഭ ചേരുമ്പോള്‍ ആഭ്യന്തര വകുപ്പിനെതിരേ രൂക്ഷമായ വിമര്‍ശനമുയരുന്നതു സര്‍ക്കാരിനെ പ്രതിരോധത്തിലാക്കും. മുഖ്യമന്ത്രിക്കും കുടുംബത്തിനുമെതിരായ ആരോപണങ്ങളില്‍നിന്നു ശ്രദ്ധതിരിക്കാന്‍ സി.പി.എം. സ്‌പോണ്‍സര്‍ ചെയ്ത ആക്രമണമാണു നടന്നതെന്ന പ്രതിപക്ഷാരോപണത്തിന്റെ മുനയൊടിക്കാന്‍ കഴിഞ്ഞിട്ടില്ല. ഈ സാഹചര്യത്തില്‍ അന്വേഷണം ക്രൈംബ്രാഞ്ചിനു കൈമാറുന്നതു പരിഗണനയിലാണ്.

വ്യാഴാഴ്ച രാത്രിയുണ്ടായ സംഭവത്തിനു മുമ്പ് 11 തവണ സ്‌കൂട്ടറില്‍ എ.കെ.ജി. സെന്ററിനു മുന്നിലൂടെ കടന്നുപോയ ആളെ പോലീസ് കസ്റ്റഡിയിലടുത്തെങ്കിലും തട്ടുകടയിലേക്കു വെള്ളമെടുക്കാന്‍ പോയതാണെന്നു വിശദീകരിച്ചതോടെ വിട്ടയച്ചു.

എ.കെ.ജി. സെന്ററിനു നേരേ കല്ലെറിയുമെന്ന് ഏതാനും ദിവസം മുമ്പു ഫെയ്‌സ്ബുക്ക് പോസ്റ്റിട്ട അന്തിയൂര്‍കോണം സ്വദേശി റിജു സച്ചുവിനെ പോലീസ് സംശയിച്ചിരുന്നു.

ജാമ്യമില്ലാ വകുപ്പുകള്‍ ചുമത്തി അറസ്റ്റ് ചെയ്‌തെങ്കിലും ഇയാള്‍ സംഭവസമയത്ത് എ.കെ.ജി.സെന്ററിന്റെ പരിസരത്ത് വന്നില്ലെന്ന് മൊബൈല്‍ ടവര്‍ പരിശോധനയില്‍ തെളിഞ്ഞു.ഫെയ്‌സ്ബുക്കില്‍ പോസ്റ്റിട്ടാല്‍ എ.കെ.ജി. സെന്ററിന്റെ മതിലിടിയില്ലെന്നു സാമൂഹിക മാധ്യമങ്ങളില്‍ പരിഹാസം നിറയുകകൂടി ചെയ്തതോടെ ജാമ്യമില്ലാ വകുപ്പുകള്‍ ഒഴിവാക്കി ഇയാള്‍ക്കു സ്‌റ്റേഷനില്‍നിന്നു തന്നെ ജാമ്യം നല്‍കുകയായിരുന്നു. കോടതിയിലെത്തിച്ചാല്‍ രൂക്ഷമായ വിമര്‍ശനമുണ്ടാകുമെന്ന ആശങ്കയും ഇതിനു കാരണമായി.

എ.കെ.ജി. സെന്ററിനു മുന്നിലൂടെ ഒരു ചുവപ്പു സ്‌കൂട്ടര്‍ പലതവണ കടന്നുപോയതായി സി.സി. ടിവി ദൃശ്യങ്ങളില്‍ കണ്ടിരുന്നു. പ്രതിയുടെ സഹായിയെന്നു സംശയിച്ചയാള്‍ തട്ടുകടക്കാരനാണെന്നു തിരിച്ചറിഞ്ഞതോടെ ഇയാളെയും വിട്ടയച്ചു.

അതിനുമുമ്പ്, ഈ പരിസരത്തു ചുവപ്പു സ്‌കൂട്ടറുള്ള എല്ലാവരെയും ചോദ്യംചെയ്യാന്‍ വരെ ആലോചിച്ചിരുന്നു. അതീവ സുരക്ഷാമേഖലയില്‍ നടന്ന സംഭവത്തിലെ പ്രതിയെ അറസ്റ്റ് ചെയ്യാന്‍ വൈകുന്നത് ആഭ്യന്തര വകുപ്പിന്റെ വീഴ്ചയായി പ്രതിപക്ഷം നിയമസഭയില്‍ ഉന്നയിച്ചേക്കും. സി.പി.എം.ഓഫീസ് ആക്രമണം കാര്യമായി അന്വേഷിക്കണമെങ്കില്‍ കോണ്‍ഗ്രസുകാര്‍ സമരം ചെയ്യണോ എന്ന പരിഹാസം സാമൂഹിക മാധ്യമങ്ങളില്‍ നിറയുകയാണ്.മനസ്സ് മീഡിയ.