മലപ്പുറം : പി.വി അന്‍വര്‍ എം.എല്‍.എക്കെതിരായ കള്ളപ്പണ ഇടപാടുമായി ബന്ധപ്പെട്ട പരാതിയില്‍ എന്‍ഫോഴ്‌സ്‌മെന്റ് ഡയറക്ടറേറ്റ് അന്വേഷണം ആരംഭിച്ചു. പശ്ചിമാഫ്രിക്കന്‍ രാജ്യമായ സിയറ ലിയോണിലെ സ്വര്‍ണ ഖനനത്തിന്റെ സാമ്പത്തിക ഉറവിടം, മംഗലാപുരം ബെല്‍ത്തങ്ങാടിയിലെ ക്രഷര്‍ ഇടപാടിലെ സാമ്പത്തിക തട്ടിപ്പ്, പി.വി അന്‍വറിന്റെ പേരിലുള്ള കമ്പനികള്‍, ഇവയുടെ ഇടപാടുകള്‍, ബിനാമി കമ്പനികള്‍ എന്നിവയെക്കുറിച്ചാണ് അന്വേഷിക്കുന്നത്.

ബെല്‍ത്തങ്ങാടിയിലെ ക്രഷര്‍ പി.വി അന്‍വറിനു വിറ്റ കാസര്‍ഗോഡ് സ്വദേശി ഇബ്രാഹിം, അന്‍വര്‍ 50 ലക്ഷം രൂപ തട്ടിയെടുത്തെന്നു പരാതി നല്‍കിയ പ്രവാസി എന്‍ജിനീയര്‍ മലപ്പുറം പട്ടര്‍ക്കടവ് സ്വദേശി നടുത്തൊടി സലീം എന്നിവരോട് ഇന്ന് കൊച്ചി എന്‍ഫോഴ്‌സ്‌മെന്റ് ഡയറക്ടറേറ്റ് ഓഫീസില്‍ നേരിട്ട് ഹാജരാകാന്‍ ആവശ്യപ്പെട്ട് ഇ.ഡി അസിസ്റ്റന്റ് ഡയറക്ടര്‍ സുരേന്ദ്ര ഗണേഷ് കവിത്ക്കര്‍ നോട്ടീസ് നല്‍കി.

മംഗലാപുരം ബല്‍ത്തങ്ങാടി താലൂക്കിലെ തണ്ണീരുപന്ത പഞ്ചായത്തിലെ ക്രഷറില്‍ 10 ശതമാനം ഷെയറും മാസം അരലക്ഷം ലാഭവിഹിതവും വാഗ്ദാനം ചെയ്ത് 50 ലക്ഷം രൂപ തട്ടിയെടുത്തെന്നാണു നടുത്തൊടി സലീമിന്റെ പരാതി.

പരാതിയില്‍ അന്‍വറിനെതിരേ കേസെടുക്കാന്‍ പോലീസ് തയാറായിരുന്നില്ല. മഞ്ചേരി ചീഫ് ജുഡീഷ്യല്‍ മജിസ്‌ട്രേറ്റ് കോടതിയുടെ ഉത്തരവിനെതുടര്‍ന്നാണ് അന്‍വറിനെതിരേ വഞ്ചനാകുറ്റത്തിനു കേസെടുത്തത്. കേസ് അട്ടിമറിക്കാന്‍ പോലീസ് നീക്കം നടത്തുന്നതായി ആരോപിച്ച് സലീം ഹര്‍ജി നല്‍കിയതിനെത്തുടര്‍ന്ന് ഹൈക്കോടതി  ക്രൈംബ്രാഞ്ച് അന്വേഷണത്തിന് ഉത്തരവിട്ടിരുന്നു.

എം.എല്‍.എയെ അറസ്റ്റില്‍നിന്നും രക്ഷിക്കാന്‍ ക്രഷര്‍ തട്ടിപ്പു കേസിനു സിവില്‍ സ്വഭാവമെന്ന് കാണിച്ച് ക്രൈം ബ്രാഞ്ച് മലപ്പുറം ഡിവൈ.എസ്.പി: പി. വിക്രമന്‍ മഞ്ചേരി ചീഫ് ജുഡീഷ്യല്‍ മജിസ്‌ട്രേറ്റ് കോടതിയില്‍ അന്വേഷണ റിപ്പോര്‍ട്ട് സമര്‍പ്പിച്ചെങ്കിലും റിപ്പോര്‍ട്ട് തള്ളിയ കോടതി തുടരന്വേഷണത്തിന് ഉത്തരവിടുകയായിരുന്നു.

ക്രഷര്‍ കര്‍ണാടക സര്‍ക്കാരില്‍നിന്നും പാട്ടത്തിന് ലഭിച്ച രണ്ടേക്കറോളം ഭൂമിയിലാണെന്നും ഇതിന്റെ പാട്ടക്കരാര്‍ മാത്രമാണ് അന്‍വറിന് കൈമാറിയതെന്നുമാണ് ക്രഷറിന്റെ മുന്‍ ഉടമസ്ഥനായിരുന്ന ഇബ്രാഹിം െ്രെകം ബ്രാഞ്ചിനു നല്‍കിയിരുന്ന മൊഴി.

ക്രൈം ബ്രാഞ്ച് റിപ്പോര്‍ട്ട് കോടതി തള്ളിയതോടെ ക്രഷറും സ്ഥലവും 2.60 കോടി രൂപയ്ക്ക് ഇബ്രാഹിമില്‍നിന്നു പി.വി അന്‍വര്‍ വിലയ്ക്കു വാങ്ങിയതിന്റെ കരാറും തുടര്‍ന്ന് ബിസിനസ് പങ്കാളികളെചേര്‍ത്തുണ്ടാക്കിയ കരാറിന്റെ പകര്‍പ്പും ക്രൈംബ്രാഞ്ച് ഹാജരാക്കി. ഇതോടെയാണ് ക്രഷര്‍ തട്ടിപ്പിലെ കള്ളപ്പണ ഇടപാടിലേക്ക് ഇ.ഡി അന്വേഷണം എത്തിയത്. ആഫ്രിക്കന്‍ രാജ്യമായിരുന്ന സിയറ ലിയോണില്‍ 20,000 കോടി രൂപയുടെ സ്വര്‍ണ ഖനന ബിസിനസ് നടത്തുകയാണെന്ന് അന്‍വര്‍ തന്നെ വെളിപ്പെടുത്തിയിരുന്നു.

പ്രവാസിയല്ലാത്ത ഇന്ത്യക്കാരന് വിദേശത്ത് ബിസിനസ് നിക്ഷേപം നടത്തുന്നതിന് ഇവിടെ നിന്ന് കൊണ്ടുപോകുന്ന പണം നികുതി അടച്ചതാണെന്ന് തെളിയിക്കുന്ന ആദായനികുതിവകുപ്പിന്റെ 15 സി.ബി ടാക്‌സ് ഡിറ്റര്‍മിനേഷന്‍ സര്‍ട്ടിഫിക്കറ്റ് നിര്‍ബന്ധമാണ്. ഇത്തരമൊരു സര്‍ട്ടിഫിക്കറ്റ് ആദായനികുതി വകുപ്പ് അന്‍വറിന് നല്‍കിയിട്ടില്ല. ആഫ്രിക്കയില്‍ ഖനനത്തിന് മുതല്‍മുടക്കുന്ന തുകയുടെ 35 ശതമാനം നികുതി അടയ്ക്കണം. ഇത്തരത്തില്‍ അന്‍വര്‍ നികുതിയും അടച്ചിട്ടില്ല. നികുതിവെട്ടിച്ച് അനധികൃത സ്വത്ത് സമ്പാദിച്ചതിന് പി.വി അന്‍വറിനെതിരേ ആദായനികുതിവകുപ്പ് കൊച്ചി പ്രിന്‍സിപ്പല്‍ ഡയറക്ടറുടെ മേല്‍നോട്ടത്തില്‍ അന്വേഷണം നടക്കുകയാണ്.2016ല്‍ നിലമ്പൂരില്‍ എം.എല്‍.എയായി മത്സരിക്കുമ്പോള്‍ തെരഞ്ഞെടുപ്പ് കമ്മിഷന് സമര്‍പ്പിച്ച സത്യവാങ്മൂലത്തില്‍ 14.38 കോടി (14,38,82,954 )രൂപയുടെ ആസ്തിയാണ് അന്‍വര്‍ കാണിച്ചിരുന്നത്. എം.എല്‍.എയായി രണ്ടര വര്‍ഷം പിന്നിട്ട് 2019തില്‍ പൊന്നാനിയില്‍നിന്നും ലോക്‌സഭയിലേക്ക് മത്സരിക്കുമ്പോള്‍ അന്‍വറിനും രണ്ടു ഭാര്യമാര്‍ക്കുമായി 65 കോടി (65,11,18,685.35)യുടെ സ്വത്തായി കുത്തനെ കൂടി. 447 ശതമാനത്തിന്റെ വര്‍ധന.

ആദായനികുതി റിട്ടേണില്‍ 201718 വര്‍ഷത്തില്‍ 40,59,083 രൂപയുടെ നഷ്ടം കാണിക്കുമ്പോഴാണ് ആസ്തിയില്‍ 447 ശതമാനത്തിന്റെ വര്‍ധനവുണ്ടായത്. എം.എല്‍.എയായ ശേഷം ആദ്യ വര്‍ഷത്തില്‍ 201617ല്‍ 59,37,042 രൂപയുടെ വരുമാന നഷ്ടമാണ് കാണിച്ചിരിക്കുന്നത്. അതേസമയം രണ്ടു വര്‍ഷംകൊണ്ട് 19 കോടി രൂപ മുതല്‍മുടക്ക് നടത്തുകയും ചെയ്തു. ഈ കണക്കുകളുടെ അടിസ്ഥാനത്തില്‍ നികുതിവെട്ടിച്ച് വരുമാനത്തില്‍ കവിഞ്ഞ സ്വത്ത് സമ്പാദിച്ചതിന് വരുമാനത്തിന്റെ സ്രോതസ് കാണിക്കാന്‍ ആദായനികുതി വകുപ്പ് നോട്ടീസ് നല്‍കുകയും പി.വി അന്‍വര്‍ അക്കൗണ്ടിനൊപ്പം ആദായനികുതി വകുപ്പ് കോഴിക്കോട് കമ്മിഷണര്‍ ഓഫീസില്‍ ഹാജരാവുകയും ചെയ്തിരുന്നു.

വരുമാനത്തിന്റെ സ്രോതസ് വ്യക്തമാക്കാന്‍ കഴിയാത്തതിനെതുടര്‍ന്ന് കൂടുതല്‍ സമയം ആവശ്യപ്പെട്ടെങ്കിലും രേഖകള്‍ ഹാജരാക്കിയിരുന്നില്ല. ഇതോടെ കോഴിക്കോട് ആദായനികുതി വകുപ്പ് കമ്മിഷണറുടെ റിപ്പോര്‍ട്ടിന്റെ അടിസ്ഥാനത്തിലാണ് ആദായനികുതി വകുപ്പ് കൊച്ചി പ്രിന്‍സിപ്പല്‍ ഡയറക്ടറുടെ മേല്‍നോട്ടത്തില്‍ അന്വേഷണം നടത്തുന്നത്.മനസ്സ് മീഡിയ.